पंढरीत पुन्हा दोघांवर कोयत्याने जीवघेणा हल्ला.

पायरी जवळ येथे बांगड्यांचा गाडा असून त्याच्या जवळच लखेरी देखील आपला गाडा लावत होता. शुक्रवारी कृष्णाने आपला गाडा निखिल ज्या ठिकाणी गाडा लावत होता तेथे उभा केला. यावरून निखिल याने त्यास रात्री अकरा वाजता माझ्या जागेवर गाडा का लावला, अशी विचारणा केली. यावरून दोघांमध्ये वादावादी सुरू असताना दर्शनासाठी आलेल्या भाविकांनी हे भांडण सोडविले.दरम्यान, निखिल याला पहाटे तीन वाजता सासुरवाडीला जायचे असल्याने तो चुलत भाऊ सूरज कोताळकर याच्याकडे गेला होता. तांबडा मारूती नजीक हे दोघे थांबले असता अचानक शुभम लखेरी, कृष्णा लखेरी, दिनेश कृष्णा गोमासे व दोन अनोळखी तरूण चारचाकीमधून आले. त्यांच्या हातात कोयते व लोखंडी सळया होत्या. शुभम, कृष्णा व दिनेश याने निखिल याला आता तुला जिवंत ठेवत नाही असे म्हणून ‘त्याच्या डोक्यात, पाठीवर, कंबरेवर कोयत्याने वार केले. तसेच सूरज याच्या हातावर, पोटावरदेखील कोयत्याने व सळईने हल्ला केला. या दोघांचा आवाज ऐकून सूरज याचा भाऊ श्रीकांत कोताळकर तेथे धावत आला असता पाचजणांनी तेथून पळ काढला. या हल्ल्यात निखिल व सूरज दोघे गंभीर जखमी असून त्यांच्यावर शहरातील खासगी रूग्णालयात उपचार सुरू आहेत.